المكالمات بين المخطوبين تجربه جميله يشهد بجمالها كل المتزوجات
إحسآس رائع تعيشه كل مخطوبه ذكرى تتلذذ فيها كل متزوجه
شعور يخليك فوق السحآب يحسسك بحلاوة الدنيا
يكون بينكم حب بلهفه بشوق بشغف كل شي بالدنيا له جانبين
وهالتجربه على روعتها تحمل جانب صعب
من ناحية :
هالمرحله حرجه حساسه
المشاكل التافهه اللي تصير فترة الملكه
على تفاهتها ممكن يصير لها تأثير حآد على النفسيه
والإنفصال بها الفتره لاسمح الله فكره وارده ومتاحه اكثر من بعد الزواج
خوف الزوجه من فقدان الحب , الاهتمام , الولع
من ابسط تغير بزوجها تبدى الهواجس
وتشعر انها غير مرغوبه وماعادت تهمه مثل اول
وأيضاً نواحي كثيره
طبعآ كل متملكه بها الفتره ماتشبع من الحب الغزل
و تتمنى تأسر قلب زوجها وتوصل فيه مرحلة العشق
من الواقع اللي عشته
من تجارب اللي حولي
من الكتب اللي قريتها
من المقاطع اللي شفتها
من المحاضرات اللي سمعتها
من الدورات اللي حضرتها
( ..كان موضوعي ..)
كيف لازم تكونين ك(أنثى) لما تكلمينه أكيد هو يختلف عن صديقتك لما تكلمينها أو أخوك وأبوك
في شي مهم جداً لاتحقرينه الصوت الناعم الأنوثي
صوتك الشي اللي تقدرين تدخلين قلبه من خلاله
كثار رجال يحبون بنات ماشافوهم بس من نبرة الصوت
( الأذن تعشق قبل العين )
شي ظروري يكون صوتك معه ناعم واطي
تتكلمين بهدوء
تدرين إن نبرة الصوت تدل بشكل أو ثاني على ثقتك بنفسك
نبرة صوتك تفنني فيها عشان تشعللينه
حسب المواقف
بتعاندينه ~> بإستهبال طبعاً مش العناد الحقيقي الممقوت عند الرجل
خلي بنبرتك دلع وطفوله
بتسألينه أو بتبينين استغرابك ~> نبرتك تكون بريئه وطفوليه
قالك شعوره ~> نبرتك يكون فيها خجل وحيا وصوتك متقطع يروح ويجي من الحيا
طبعاً المواقف كثيره والخيارات كثيره انا هنا اوضحلك بس
ضحكتك أنتبهي تضحكين بصوت عالي
أذكر مره قريت قصه عن اعرابي غضب على زوجتك لأنهم كانوا بقافله وضحكت ضحكه شهقت بنهايتها ~> هذي الحركه تدووخ..
غضب عليها لأنه عارف تأثير ضحكة المرأه على الرجل
كثير ضحكات نحب نسمعها خصوصاً الضحكه الناعمه تخطف قلب الرجل
(ألفاظك)
لايسمع منك إلا كل لفظ جميل أبتعدي عن الألفاظ الذكوريه السوقيه
خلي ألفاظك راقيه تدل عليك بريئه وغير متكلفه ولاتروحين تقولين له كل لفظ جديد متداول بين المراهقين
انتبهي نقظة الألفاظ هذي مره مهمه لاتخلينه يسمع منك شي ممكن يسمعه من ربعه إنتي غير
هذا بإختصار يتعلق بأنوثتك معه ع التلفون والباقي أكثر
بعد ماتدخلون بعز العلاقه وتتعودون شوي على بعض
لما تتعودين على اهتمامه حبه شوقه ولهفته عليك
فجأه تخف أو تنعدم
أنتي هنا تكتئبين ويضيق صدرك
وتبدين تهوجسين ليش ماعاد يحبني
ماعدت أعجبه
مل مني طفشته
فيه اقتباس مره مهم من كتاب الرجال من المريخ النساء من الزهره :
اقتباس:
الرجال مثل الاحزمة المطاطية !
اقتباس:
الاحزمة المطاطية هو تعبير مجازي مثالي لفهم دورة الحب عند الرجل ..
ان هذة الدورة تقتضي الاقتراب ثم الانسحلب ثم الاقتراب مرة اخرى ..
معظم النساء يندهشن حين يدركن انه عنما يحب رجلاً امرأة فانه يحتاج دورياً الى ان ينسحب قبل ان يتمكن من الاقتراب ..
والرجال يشعرون فطرياً بهذا الدافع الى الانسحاب ..انها ليست قراراً او اختياراً ..
انه ليس خطؤه ولا خطئها ..انها فقط دورة طبيعية !
اذا لم يحصل الرجل على فرصة للأنسحاب ..وضلت المرأة متمسكة به ..
فانه لن يشعر برغبة قوية في الاقتراب منها اكثر ..
من الضروري للنساء ان يفهمن انهن اذا اصررن على مودة مستمره ..
و”جرين خلف ” ازواجهن عندما يبتعدون ,
فأنه عندئذ سيحاول دائماً ان يهرب وينأى بنفسه ! ولن يجد ابداً فرصة لكي يشعر بشوقه المتقد للحب ..
يبدأ الرجال في الشعور بحاجتهم الى الاستقلال والحرية بعدما يشبعون حاجتهم الى الحب .
وبصورة آلية عندما يبدأ هو في الانسحاب تبدأهي بالشعور بالذعر !. ,
ان مالا تدركه انه عندما ينسحب ويشبع حاجته الى الاستقلال سيشعر فجأة بالحاجة الى الحب والمشاعر
المتدفقة مرة اخرى ..فالرجل يتعاقب آلياً بين مشاعر الحب ومشاعر الاستقلال …وهذا ما يجب ان تدركه النساء جيداً .
اتوقع فهمتوا المقصد
هالمثال قد ذكرته من قبل لعضوه من عضوات المنتدى
الفراوله اللي تحبينها وتستلذين فيها
لما تاكلينها كل يوم
وممكن أكثر منن مره في اليوم بعد فتره نقول شهر أو أوقل
ايش بيصير فيك !
ماراح تملين منها ماراح يجيك وقت ماتبين فراوله أبداً مع إنك تحبينها
وماكرهتيها بس محتاجه تتركينها فتره عشان ترجعين لها بنفس النهم
بالظبط نفس الفكره مع الرجل
أعتبري نفسك فراولته
أنتبهي يشبع منك
بتكلم عن شغله من زمان ببالي كانت من الدوافع اللي دفعتني أسوي الموضوع
عزيزتي المتملكه
شي طبيعي إنك مسجله أو زائره لها المنتدى ومنتديات غيرها تقرين وتتعلمين كيف تتعاملين مع زوجك
أنا هنا بنصحك
لاتصدقين كل شي تقرينه !!
بذكرلك قصه صغيره حصلتلي
قريت مره عن رساله أرسلتها وحده لزوجها وتقول انها جننته وانه مره انبسط عليها
أنا أرسلتها لزوجي وندمت
المسج جداُ عادي بس هو مو متوقعه مني ..
الفكره اللي بوصلها لك ..
لما تقريت عن تجربه او موقف
لاتروحين تطبقينه مع ابو الشباب
لاتنسين إن اللي كاتبه التجربه غير
غير عنك انتي وزوجها غير عن زوجك
علاقتها بزوجها من حيث عمق العلاقه غير عنك
بيئتها غير مجتمعها غير تقاليدها غير
حطي ببالك هالشيء مو تروحين تنبرشين وتقلدينها
وكثير نصائح بالمنتدى صراحه مالها سنع
واغلبها توجه الزوجه انو اهتمي بزوجك وعوديه عليك صبحيه ومسيه على صوتك وغرقيه مسجات
يعني ألصقي فيه
والمسكينه تروح تصدق وتطبق هالكلام وتنشب لزوجها لين يعيفها
ترى فيه نصائح كثيره عشوائيه وغير مدروسه لاتصدقين كل شي تقرينه
ولاتصدقين أي وحده تجيك تنصح
هي ايش عرفها بزوجك ايش عرفها فيك عشان تنصحك بتصرفات ممكن مايتقبلها زوجك
ولاتصدر منك .
.
قريت عضوه تكتب تجربتها مع نصائح صديقتها كانت تنصحها حسب المزاج
لما تكون متضايقه ومالها خلق تشيشها على زوجها لما تكون رايقه توصيها عليه
شفتوا كيف خلتها ضحية مزاجها !
وعلى كل حال لاتنسين إن الرجال يختلفون
كل واحد وله شخصيته وميوله لاتعممين
اللي يعجب زوج صديقتك مايعجب زوجك
والل يحبه زوج العضوه بالمنتدى عيب عند زوجك
نقطه ثانيه لاتقل أهميه
انتي كـ أنثى رغبه فطريه فيك انك تحسين انك مرغوبه
محبوبه جميله
ودك إنك تخلينه يحس إنه ماخذ (لؤطه ) على قولتهم
ودك يعرف قيمتك وقدرك وإعجاب الناس فيك
لما تنمدحين أو يصير موقف تتمنين إن المسيو يسمعه أو يدري فيه عشان
كذا تروحين تنقلينله الموقف بحذافيره مع بعض بهارات وتهويل منك
وممكن تلجئين انك تسردين قصص خياليه ماحصلت
للشعوب اللي داخوا على جمالك
وللطوابير اللي جو يخطبونك
أحذرك يالحبيبيه
أنتي كذا تحطين من قيمتك قدام نفسك قبل قيمتك عنده ..
انتي لما تتعرفين على وحده وتطيحلك مدح بعمرها وكلام الناس عنها واللي انبهروا فيها و….و.. الخ
وش بتحسينها !
طبعاً هالشي بينقص قيمتها بعينك ليش !
لأنها تهايط !
تتفشخر !
بتحسينها إنسانه مو واثقه بنفسها !
ولاليش تقولك هالمواقف !
بتقولين لي الرجل يختلف عن الأنثى و بيصدق كلامي والله مايضحكني غير هالكلام معتبرين الرجال غبي ومغفل
أنتبهي حبيبتي ترى الرجال ذكي ذكي ومن ذكاءه يتغابى ويمشيلك أرانبك
أدري ان المقصود تكبرين نفسك بعينه وتستثيرين غيرته عشان تتمتعين بجرعة حب
لاكن انتي بها الطريقه تشوهين صورتك وبس
غير عن إن الكذب مايجوز انتي نفسك بتحقرين ذاتك ..
مافيه مانع إنك تسوقين لنفسك مثل ماتقول الأستاذه ناعمه
لاكن بشي حقيقي حاصلك وبدون تهويل وإفتعال شي ماحصل
ولاتقحمين السالفه إقحام عشان يفهم انك تبين تمدحين نفسك
مع مجرى السوالف الطبيعي ممكن تذكرين موقف ..
ولايصير همك بس تحكين له عن حالك وجمالك ودلالك ..
خلي معدل سوالفك بها الأمور طبيعي لاتكثرين
